4.4 Projekportefeulje

Opdrag 4b:

Om ‘n lys van veiligheidsmaatreëls te maak

Maak ‘n lys van verskillende veiligheidsmaatreëls wat jy moet nakom by die gebruik van ‘n spesifieke stuk gereedskap terwyl jy jou kissie maak.

Voorbeeld: Dra ‘n skêr met die skerp kant na onder.

ONTWERP

Opdrag 5:

Om ‘n deksel vir jou kissie te maak

Ontwerp en teken verskillende soorte deksels vir jou kissie. Maak ‘n finale keuse deur ‘n regmerkie by daardie skets te maak. Skryf ook goeie redes vir jou keuse neer. Teken dan jou keuse in ‘n toe posisie en in isometries.

VERVAARDIGING

Opdrag 6:

Om ‘n die binnekant van jou kissie met karton te versterk

Neem karton en meet die vyf binnekante uit. Knip dit uit en plak dit aan die binnekant van die kissie vas om dit te versterk. Is al die binnekante ewe groot? Verduidelik.

ONDERSOEK/NAVORSING

Opdrag 7:

Om ‘n verklarende woordeboek te gebruik

Gebruik ‘n verklarende woordeboek en slaan die betekenis van die woord SKARNIER daarin na en skryf dit neer.

Opdrag 8:

Kyk in jou onmiddellike omgewing en teken sketse van verskillende soorte skarniere. Skryf onder elke skets waar jy elke soort skarnier gesien het.

ONTWERP

Verskillende maniere om die deksel deur middel van ‘n skarnier vas te heg.

Opdrag 9:

Om ‘n deksel vas te heg

Teken prentjies of plak voorbeelde van prente met byskrifte hoe om die deksel aan die kissie vas te heg met ‘n skarnier. Maak ‘n merkie by jou finale keuse.

ONTWERP

Versterk die buitekant van jou kissie met hout.

Opdrag 10:

Om jou kissie te versterk

Neem die 40 roomysstokkies en beplan hoe jy dit aan die buitekant van jou kissie gaan vaslym. Die hele buitekant van die kissie, asook die deksel moet met stokkies bedek wees. Jy mag minder as 40 stokkies gebruik en die stokkies mag gesaag word. Slegs die onderkant/bodem mag nie met stokkies bedek wees nie.

VERVAARDIGING

Opdrag 11:

Heg die deksel sowel as die roomysstokkies aan die kissie. Werk netjies en spaarsamig met die gom. Sny die stokkies korter met ‘n mat-/utiliteitsmes/saag en veiligheidsliniaal op ‘n gepaste oppervlakte. Wees versigtig dat jy nie jouself raak sny nie. Sny die stokkies deur een kant te keep, dit dan om te draai, weer te keep en dit versigtig af te knak. Skuur die rande glad met sandpapier voordat jy hulle vasgom op die buitekant. As jy ‘n klomp stokkies dieselfde lengte wil sny, kan jy hulle eers met maskeerband teen mekaar vasplak en daarna korter sny.

NAVORSING/ONDERSOEK

Opdrag 12:

Teken of plak prente van verskillende vasmaakmeganismes. Verskaf ook byskrifte.

Opdrag 13:

Om jou kissie te versier

Versier die buitekant van jou kissie deur dit te verf/ te spuitverf/ te stensil, ens. en te vernis. Laat dit na elke stap deeglik droog word. Versier dit daarna op enige manier van jou keuse. Voorsien die sluitmeganisme en plak ook die kledingstof aan die binnekant van jou kissie.

Watter eienskap verkry die hout deur dit te vernis?

Onderstreep: waterbestand / brandbestand / termiese isolasie