2.1 Die son as bron van energie

Natuurwetenskappe

Graad 4

Energie en verandering

Module 26

Die son as bron van energie op aarde

Aktiwiteit:

Om die son as bron van energie vir lewe op aarde te beskryf

[LU 2.1]

Die son is natuurlik ons belangrikste bron van energie. Die mens aanvaar die son as vanselfsprekend, want ons sien elke oggend die son opkom en saans sien ons dit weer ondergaan. Die son stuur sy energie in alle rigtings oor die aarde. Die son verhit die aarde en gee dus op hierdie manier energie aan die aarde. Die plante gebruik van hierdie energie om te groei en wanneer diere die plante eet, kry hulle ook van hierdie energie! Die diere gebruik weer die energie om te beweeg en te groei.

Waar kry ons as mense ons energie vandaan?

Verduidelik in ‘n kort sinnetjie wat op elk van die volgende prentjies gebeur. Skryf die sin netjies onder elke prentjie neer.

Energie is dus nou vanaf die son na die koringplant en vandaar na Phillip se liggaam oorgedra. Hierdie oordrag is soos wanneer jy pouse ‘n broodjie met jou maatjie sal deel. Jy gee dit mos weg vir hom/haar.

Assessering

LEERUITKOMS 2: KONSTRUKSIE VAN WETENSKAPLIKE KENNISDie leerder ken, interpreteer en pas wetenskaplike, tegnologiese en omgewingskennis toe.

Assesseringstandaard

Dit is duidelik wanneer die leerder

2.1 betekenisvolle inligting onthou.

Memorandum

Sinne wat by die prentjies pas

Die son gee energie aan die koringplant, wat dan die energie stoor.

Die brood en pap bevat nou die energie van die koring.

Phillip se liggaam neem nou die energie op.

Hy gebruik energie om te oefen.

Om kos gaar te maak deur sonenergie te gebruik

• Neem ‘n polisterienkoppie en voer dit met plastiek uit en sit kos daarin.
• Bind die bokant van die koppie toe met ‘n stuk plastiek en bind dit stewig met ‘n rek toe.
• Neem ‘n A4-stuk papier of karton en sit aluminiumfoelie op die een kant, maak ‘n keëlvorm daarmee en sit dit rondom die koppie met die foelie aan die binnekant. Sny dit netjies.
• Sit die koppie met die keël in ‘n ander polisterienkoppie en sit dit in ‘n houer om regop te bly; sit sommer koerantpapier rondom om dit te stut.
• Sit dit nou in die son, en maak seker dat die “oondjie” na die son toe wys”.
• Los dit so totdat die kos gaar is. Beweeg die pot, sodat dit altyd na die son toe wys.