4.1 Ons oefen speel-speel

Lewensoriëntering

Graad 4

Fisiese ontwikkeling en beweging

Module 15

Ons oefen speel-speel

Gimnastiese oefeninge vir liggaamsbeheer

Aktiwiteit 1

Om oefeninge vir liggaamsbeheer uit te voer [lu 4.2]

Voortbeweging (locomote): die diere-karnaval

Materiaal: Bandspeler met kasset of CD. (Die Karnaval van die Diere deur die komponis, Saint-Saëns, is ‘n goeie keuse).

Wanneer die musiek begin speel, boots die leerders die bewegings van sekere diere na.

Sodra die musiek stop, moet die leerders “vries” tot die musiek weer begin.

Elke keer wat die musiek opnuut begin, moet die leerder ‘n ander dier uitbeeld.

Voorbeelde van diere en hulle bewegings (Leerders kan aangemoedig word om hulle eie diere en bewegings uit te dink):

Die beer: hande-viervoet kruip.

Galloppende perde: Die knieë word telkens hoog opgelig.

Paddaspring: Hop vanaf hurke na arms.

Vlieënde voëls: Hardloop en flap die vlerke (arms) op en af.

Hasie hop: Hop op hurke rond sonder om met die hande die grond te raak.

Aan die einde van die oefening kan die leerders of opvoeder die leerder uitwys wat die interessantste dierbewegings uitgevoer het.

Aktiwiteit 2

Om rondomtalie-speletjie te speel [lu 4.2]

Roteer: rondomtalie-spel

Materiaal: Bandspeler met kasset of CD. Enige vrolike ritmiese musiek is geskik. Stadige en vinnige musiekvoorbeelde kan ook afgewissel word.

• Leerders vorm ‘n groot kring ten minste ‘n armlengte uitmekaar.
• Wanneer die musiek begin, roep die onderwyser een leerder se naam uit.
• Die leerder moet dan ‘n roterende beweging begin uitvoer.
• Al die ander leerders moet die beweging dadelik na-aap. ‘n Aanhoudende beweging op een plek is ook toelaatbaar.
• Elke keer as die musiek gestop het, moet die groep na die ander kant beweeg. Dit is belangrik dat die sirkel behou word.

Voorbeelde van rotasie-beweging

• Die windmeul: Swaai die arms op en af en draai tegelykertyd in die rondte.
• Die tol: Tol vinnig al in die rondte.

• 

  Die hobbelperdjie: Lê op jou maag. Hou die enkels met die hande vas sodat jou maag agtertoe buig soos ‘n bootjie en wieg vorentoe en agtertoe.
• Die wiegie: Sit met jou knieë opgetrek en hou jou bene styf vas met albei arms. Wieg so ver moontlik vorentoe en agtertoe.

Moedig kreatiewe bewegings aan, maar staak dadelik onbeheerste wilde bewegings wat tot beserings kan lei.

Aktiwiteit 3

Om sirkustoertjies uit te voer [lu 4.2]

Oplig: sirkustoertjies/posisies

Verdeel die leerders in pare.

Leerders kry drie minute om ‘n sirkusposisie uit te werk.

Tydens die toertjie mag een van die twee leerders glad nie aan die grond raak met enige deel van sy lyf nie.

Leerders moet ‘n naam vir hulle posisie uitdink.

Na drie minute kry elke paar die geleentheid om hulle posisie/toertjie vir die klas te demonstreer. Die klas kan dan stem vir die interessantste/beste/snaaksste posisie, ens.

Voorbeelde van sirkus-posisies:

Die dubbele krap-posisie: Leerder A staan omgekeerde hande-viervoet (d.w.s. met die maag na bo) en leerder B staan in dieselfde posisie, maar met sy voete op die knieë van leerder A en sy hande op sy maat se skouers.

Die dubbeldekkerbus-posisie: Leerder A staan hande-viervoet op die grond en leerder B hande-viervoet met sy knieë op die rug van A en sy hande op leerder A se skouers.

Die helikopter-posisie: Leerder A lê op sy rug met sy bene in die lug. Leerder B gaan lê met sy maag bo-op leerder A se voete en strek sy lyf reguit uit met sy arms na voor.

Aktiwiteit 4

Om balanseertoertjies uit te voer [lu 4.2]

Balanseer: piramides

Leerders word in groepe van drie tot vyf verdeel.

Groepe moet nou ‘n piramideposisie uitdink waarin balans ‘n rol speel

Groepe word vyf minute toegelaat om ‘n posisie te beplan en te oefen.

Elke groep kry die geleentheid om sy piramide te vertoon.

Punte uit 10 kan deur die leerders of opvoeder toegeken word.

Voorbeelde van moontlike piramide-posisies:

Twee leerders staan hande viervoet met hulle voete se onderkante teen mekaar. Die derde leerder balanseer deur met ‘n voet op elk van die ander twee se rug te staan en sy arms in die lug te steek.

Vyf leerders balanseer in ‘n waaier posisie met almal se voete teenaan mekaar. Leerder 1 en 5 raak met een hand aan die grond. Die groep vorm as’t ware ‘n gradeboog met die grond.

Assessering

LEERUITKOMS 4: LIGGAAMLIKE ONTWIKKELING EN BEWEGING

Die leerder is in staat om begrip te toon vir en deel te neem aan aktiwiteite wat beweging en liggaamlike ontwikkeling bevorder.

Assesseringstandaard

Dit is duidelik wanneer die leerder

4.2 verskillende maniere toon om te beweeg, in die rondte te draai, te lig en te balanseer deur verskillende liggaamsdele.